Instagram бегуноҳ фойдаланувчиларни ноҳақ блокламоқда
0
Мета компаниясининг автоматик тизимлари туфайли Instagram ва Facebook'да кўплаб фойдаланувчилар ноҳақ равишда блокланмоқда.
Блоклаш туфайли одамлар йиллар давомида йиғилган суратлари, хотиралари ва саҳифалари орқали топадиган даромадидан айрилмоқда. Айримлари мижозларини йўқотган, бошқалари эса шахсий ҳаётидаги энг муҳим лаҳзаларини абадий йўқотиб қўйган. Энг ёмон томони, бегуноҳ инсонлар полиция текшируви эҳтимолидан қўрқиб, руҳий тушкунликка тушмоқда.
Масалан, Нидерландиялик Ясмине ўз оилавий бизнесини беш йил давомида Instagram орқали юритиб келган. Аммо бирданига саҳифаси ёпилди ва у 5 мингдан ортиқ мижозини йўқотди. Техаслик Лусиа эса ҳеч қандай сабаб бўлмаса ҳам “қоидабузар” сифатида икки ҳафтага блокланди.
Британиялик собиқ ўқитувчи Рян ҳам бир неча марта ноҳақ блокланди. Ҳатто Instagram хатолик юз берганини тан олиб, “сиз ҳеч қандай қоидани бузмагансиз” деб хабар қилган. Шунга қарамай, унинг саҳифаси яна ёпилиб, ҳозиргача тикланмаган. Рян ўзини жамиятдан узилган ва ҳатто жиноятчи сифатида кўрилишидан қўрқмоқда.
Мутахассислар Мета сунъий интеллект тизимларига ҳаддан ташқари таянаётганини айтмоқда. Инсон омилини ҳисобга олмагани учун нотўғри блоклашлар давом этмоқда. Бу эса оддий одамларнинг ҳаётига катта зарба бериб, бегуноҳ инсонларни асоссиз равишда “жиноятчи”га айлантирмоқда.