Нега кўплаб аёллар ишини ташлаб кетмоқда?
0
Сўнгги маълумотларга кўра, 2025-йилнинг дастлабки олти ойида АҚШда 212 минг аёл ишини ташлаб кетган. Шу даврда эса 44 минг эркак янги ишга кирган. Бу кўрсаткич аёллар орасида ишга бўлган муносабат ўзгараётганини кўрсатмоқда.
Мутахассисларнинг айтишича, бу сафар кўплаб аёллар мажбур бўлиб эмас, балки ўз ихтиёри билан ишидан воз кечмоқда. Уларнинг айримлари фарзандларига кўпроқ вақт ажратишни истаса, бошқалари ўз бизнесини бошлашни ёки янги соҳада синаб кўришни хоҳламоқда.
Пандемия даври ҳам бу қарорга таъсир қилган. Масофадан ишлаш, кўпроқ бўш вақт ва оилага яқин бўлиш имконияти кўплаб аёлларга ҳаётини бошқача тасаввур қилишга ёрдам берди. Шундан сўнг айримлари ишни давом эттиришдан кўра оилага ёки шахсий ҳаётга эътибор қаратишни танлади.
Шу билан бирга, ҳамма аёллар ҳам бундай имкониятга эга эмас. Кўпчилик аёллар ҳануз молиявий қийинчиликлар, болани парвариш қилиш харажатлари ёки иш қисқартиришлари туфайли меҳнат бозорини тарк этишга мажбур бўлмоқда.
Мутахассислар бу ҳолатни икки томонлама баҳолайди: баъзи аёллар учун бу — эркин танлов ва янги имконият, бошқалар учун эса мажбурият. Бу эса жамиятда аёлларнинг меҳнатдаги ўрни ва имкониятлари ҳақида кенгроқ муҳокама қилиш зарурлигини кўрсатади.