Татар хатын-кызлары форумына Казахстан, Үзбәкстан, Кыргызстан, Төркиядән кунаклар көтелә

«Ак калфак» Бөтендөнья татар хатын-кызлары иҗтимагый оешмасы рәисе Кадрия Идрисова Бөтендөнья татар хатын-кызлары форумы нечкәлекләре турында сөйләде.

«Без бу җыенга татар хатын-кызының язмышын чагылдырган, фәнни эшләр белән шөгыльләнгән хатын-кызларны, галимәләрне тупларга тырыштык. Казахстан, Үзбәкстан, Кыргызстан, Төркиядән кунаклар көтелә», – дип аңлатты ул «Татар-информ»да матбугат очрашуында.

Аның әйтүенчә, делегатлар 27 августта иртән Тәтешкә китә һәм кичкә кадәр шунда булалар. Тәтештә дә аларны төркемнәргә аерачаклар: 300 хатын-кызның бер өлеше Бакырчы авылында, икенче төркеме Әтрәч, ә өченче төркеме Келәш авылларында булачак», – диде Кадрия Идрисова.

«Соңыннан Тәтештә балаларны кечкенәдән үк «милләт анасы һәм атасы» буларак тәрбияләүгә багышланган «Калфак туе» оештырачакбыз. «Калфак туенда» без оештыра торган башка чараларда катнашучылар булачак», – дип сөйләде «Ак калфак» Бөтендөнья татар хатын-кызлары иҗтимагый оешмасы рәисе.