Алматы балабақшасындағы видео: тәрбиеші балаға қатал қарады деп айыпталды

Алматыда балабақша тәрбиешісі балаға қатал қарады деп айыпталды. Баланың ата-анасының айтуынша, қызметкер баланы тартып қалып, соның салдарынан ол құлап, маңдайын жарақаттап алған, - деп хабарлайды Tengrinews.kz тілшісі.
Әлеуметтік желілерде оқиғаның видеосы жарияланды. Кадрларда тәрбиеші мен балалар көрінеді. Балабақша қызметкері бір баланы киіндіріп, кейін екіншісін алады, бала тізерлеп отырып қалады, тәрбиеші оны көтеруге тырысқанда ол қайтадан құлайды. Кейін әйелдің баланы құшақтап көтеріп жатқаны байқалады.
Кадрлар желі қолданушыларының әртүрлі пікірін тудырды. Біреулер тәрбиеші баланы қатты тартып қалып, соның салдарынан ол құлап, орындыққа соғылды деп ойласа, басқалары керісінше, бала өзі құлап, ал әйел оны жұбатты дейді.
Не болса да, кішкентай қыз маңдайынан жарақат алып, оған тігіс салынған. Қазір бұл жағдайды полиция мен Алматы білім басқармасы тексеріп жатыр. Полиция департаменті мәліметінше, бұл факт бойынша Бостандық аудандық полиция басқармасы қылмыстық іс қозғаған.

"Нақты мән-жайлар анықталып жатыр, одан кейін қолданыстағы заңнамаға сәйкес шаралар қабылданады", – деп хабарлады ведомство.

Қалалық білім басқармасында ата-аналар 18 тамызда шағымданғаны айтылды. Осыдан кейін №40 ясли-бақшасына аталған мектепке дейінгі ұйымның қызметін бақылау үшін комиссия жіберілген.
Сілтемесіз жаңалық оқисыз ба? Онда Telegram желісінде парақшамызға тіркеліңіз!