Сув қудуқлари учун давлат 90% харажатни қоплаб беради

Қорақалпоғистон ва Хоразмда муҳтож аҳоли учун артезан қудуқ қазиш ва сув чиқарувчи ускуналар ўрнатишга давлат томонидан субсидия ажратилади, деб UPL.uz хабар берди.

2025 йил 1 июлдан бошлаб, ижтимоий рўйхатдаги эҳтиёжманд оилалар мазкур ёрдамдан фойдаланиши мумкин. Давлат бу ишларнинг умумий қийматининг 90%ини қоплаб беради, лекин харажат 30 баробарлик базавий ҳисоблаш миқдоридан ошмаслиги керак (30 БҲМ — 10 200 000 сўм атрофида).

Янги ёндашувга кўра, фуқароларга наҳд пул бериш ўрнига улар учун муаммони ҳал қиладиган ишга маблағ ажратилади. Бу орқали тоза ичимлик сувига бўлган талаб ҳал этилиши кутилмоқда.

Ишларни бажарувчи тадбиркорлар фақат махсус реестрга киритилганлардан бўлиши шарт. Улар сув қудуғини қазиш, насос ва фильтр ўрнатиш ишларини амалга оширади. Реестр “Ягона ижтимоий ҳимоя тизими” билан боғланади.

Субсидияни олиш учун қатор шартлар мавжуд:

1. Бутун иш тасдиқланган пудратчи томонидан бажарилиши;

2. Маҳаллада уч томонлама акт тузилиши: бу ҳужжатда қудуқ қазилгани ва ускуна ўрнатилгани тасдиқланади. Унга маҳалла раиси, СҚМ вазирлиги ва субсидия олувчи имзо қўяди;

3. Сув сифати ижобий баҳоланиши керак — тегишли органлар томонидан ичимликка яроқли деган хулоса берилиши шарт.

Фуқаролар “Инсон” марказлари ёки маҳалладги ижтимоий ходимлар орқали “Ягона ижтимоий ҳимоя тизими”га рўйхатдан ўтишлари лозим. Ариза тасдиқлангандан сўнг, рўйхатдаги тадбиркор белгиланган муддатда ишни бошлаши керак.

Айрим жойларда артезан сувлар шундай босимдаки, насоссиз ҳам ўзи юзага чиқиб, фонтан ҳосил қилиши мумкин. Шу боис, бундай манбаларда ускуна ўрнатиш талаб этилмаслиги мумкин.