Аббосбек расман «Истанбул Башакшехир» футболчисига айланди

Ўзбекистон терма жамоаси ярим ҳимоячиси Аббосбек Файзуллаев расман Москва ЦСКА жамоасидан Туркиянинг “Истанбул Башакшехир” клубига ўтди, деб Kursiv хабар берди.

ЦСКАнинг коммуникациялар директори Кирилл Брейдо маълум қилишича, трансфер учун тўлов шартномада кўрсатилганидек, клуб ҳисоб рақамига тўлиқ тушди. Бунинг ортидан ЦСКА томонидан трансфер сертификати тезда юборилган ва келишув расман ёпилган.

Брейдога кўра, ушбу битим ўзаро ишонч, кафолатлар ва келишув нуқтаи назаридан ўзига хос бўлди. У «Истанбул Башакшехир» клубига ва ProSports Management раҳбари Герман Ткаченкого миннатдорлик билдирди.

Файзуллаев ЦСКАда 2023 йил августидан буён тўп сурди. У жамоа сафида 72 учрашувда иштирок этиб, 8 гол ва 22 голли узатма қайд этди. У Россия Кубоги ва Суперкубокни қўлга киритган, шунингдек, МИР РПЛ бронза медалини ютган. Аббос Осиёнинг йилнинг энг яхши ёш футболчиси деб тан олинган.