Казанда туберкулез белән авыручы өч кешене мәҗбүриләп дәвалануга җибәрделәр
Казанда суд приставлары туберкулездан дәвалану турындагы суд карарын үтәүдән баш тарткан өч кешене мәҗбүриләп хастаханәгә озатты.
Рейд билгеле бер кыенлыклар белән узды. Бер гаилә Федераль суд приставлары хезмәте вәкилләрен өенә кертмәде, ә тагын бер хатын-кыз хастаханәгә озатканда актив каршылык күрсәтте. Аларга законга каршы килә торган гамәлләре өчен административ материаллар төзелде.
Нәтиҗәдә, Казанда яшәүче өч кеше Республика туберкулезга каршы клиник диспансерына мәҗбүри дәвалануга җибәрелде. Әлеге чара законлы һәм куркыныч йогышлы авыру таралуын булдырмауга юнәлдерелгән, дип хәбәр итә ведомствоның матбугат хезмәте.