«Татмедиа» акционерлык җәмгыятендә беренче сыйныф укучылары өчен бәйрәм узды

Бүген Казанда «Татмедиа» хезмәткәрләренең яңа уку елында беренче тапкыр мәктәп парталары артына утырачак балалары өчен бәйрәм узды. Беренче сыйныф укучыларын һәм аларның ата-аналарын «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев котлады.

«Барыгызны да бәйрәм белән котлыйм! Алда сезне зур киләчәк көтә, сезгә зур юл үтәргә туры киләчәк», - диде ул.

«Татмедиа» генераль директоры Шамил Садыйков хәбәр иткәнчә, «Татмедиа» хезмәткәрләренең 51 баласы Казанда һәм республиканың төрле районнарында быел беренче тапкыр мәктәпкә барачак.

«Беренче сыйныф укучыларын котлау – безнең күркәм традициябез. Ел саен без балаларга портфельләр бүләк итәбез, бәйрәм концерты оештырабыз. Ел саен барысы да бу бәйрәмне көтә, бигрәк тә балалар. Аларның әти-әниләре кебек акыллы, матур һәм талантлы булуларын телибез», – диде Шамил Садыйков.

«Татмедиа»да иҗади һәм сәләтле кешеләр эшли, дип өстәде ул.

«Сезнең балаларыгыз да бу юнәлешне дәвам итәрләр, үзләрен бу тормышта табарлар дип өметләнәм. Бәйрәм белән!» – дип йомгаклады «Татмедиа» генераль директоры, балаларның әти-әниләренә мөрәҗәгать итеп.

«Татмедиа» ашханәсендә күңелле музыка уйнады һәм бәйрәм рухы хөкем сөрде. Чәй табыны янына әти-әниләре белән 11 бала җыелды. Кунаклар алдында «СалаваТік»төркеме чыгыш ясады. Булачак укучылар Белем көненә бүләккә язу кирәк-яраклары салынган букчалар алды.

Элегрәк «Татар-информ» хәбәр иткәнчә, яңа уку елында Татарстан мәктәпләренә 49 меңнән артык беренче сыйныф укучысы бара. Яңа уку елында мәктәпләрдә укучыларның гомуми саны 521 меңнән артып китә. 2448 урынга исәпләнгән ике яңа мәктәп һәм 611 урынга исәпләнгән өстәмә өч корпус сафка бастырылачак.