Тошкентда иссиқ сув ва иситиш тарифлари оширилади
Тошкентда иссиқ сув ва иситиш хизматлари учун тарифлар оширилиши режалаштирилмоқда, деб Kursiv хабар берди. Кенгаш халқ депутатлари Veolia Energy Tashkent компаниясининг таклифини маъқуллади.
Янги нархлар аҳоли учун 15%, юридик шахслар учун 40%, бюджет ташкилотлари учун эса 18,8%га ошиши кутилмоқда. Қарорни энди пойтахт ҳокими Шавкат Умурзаков имзолаши керак. Компания 2025 йил 1 октябрдан янги тарифларни жорий этишни таклиф қилмоқда.
Veolia Energy Tashkent бош директори Севара Пардаевага кўра, ҳозир аҳоли фақат хизмат қийматининг 18%ини тўламоқда, қолган қисм бюджетдан субсидия орқали қопланмоқда. Ҳукумат эса 2030 йилгача субсидиялардан тўлиқ воз кечишни режалаштирган. Шу боис компания тўловни босқичма-босқич 100%гача етказиш ниятда.
Шунингдек, 2025–2026 йилларда Veolia деярли 474 км эскирган қувурларни таъмирлаб алмаштириш, 73 км иссиқлик тармоқларига капитал таъмир ўтказиш ҳамда қозонхоналар ва насос станцияларини янгилашни режалаштирган.