Дарёлар қуримоқда – далалар хавф остида
0
Шотландиянинг Абердиншир ҳудудидаги Деверон дарёси сўнгги 50 йил ичида энг паст даражага тушиб қолди. Мутахассислар бу вазиятни жиддий хавф сифатида баҳолаб, сувдан фойдаланишга чекловлар қўйди.
Энди қишлоқ хўжалиги ва саноат корхоналари табиатдан сув олишни камайтириши шарт бўлади. Бундай қарор дарёни, атроф-муҳитни ва у билан боғлиқ ҳаётни ҳимоя қилиш учун қабул қилинди.
Мутахассисларнинг айтишича, бу ҳолат иқлим ўзгаришлари натижасида юзага келмоқда. Агар яқин кунларда кучли ёмғир ёғмаса, Шарқий Шотландиядаги бошқа дарёлар ҳам хавф остида қолиши мумкин.
Расмий маълумотларга кўра, Шотландиянинг шарқий қисмидаги сув омборлари одатдагидан анча паст даражада — 56 фоиз кўрсаткичда. Бу эса аҳолига, фермерларга ва табиий муҳитга қийинчилик туғдириши мумкин.
Мутасаддилар чекловлар вақтинча эканини билдирган. Шароит яхшилангач, улар бекор қилинади. Аммо ҳозирча одамлар сувдан имкон қадар тежаб фойдаланишга чақирилмоқда.