UzAuto Motors соф фойдаси ҳамон тушиш тенденциясини кўрсатмоқда

Жорий 2025 йилнинг биринчи ярмида UzAuto Motors компанияси умумий даромадлари 21,2 триллион сўмга етгани маълум қилинди. Бу кўрсаткич 2024 йилнинг шу давридаги натижаси — 23,4 трлн сўм — билан солиштирганда 9,5 фоизга камайгани аниқланди.

Корпоратив ахборот ягона порталида эълон қилинган молиявий ҳисоботлардан кўринишича, ярим йиллик даврда UzAuto Motors соф фойдаси 1,38 трлн сўмни ташкил этди. Бу рақам ўтган йилнинг мос даврида қайд этилган 1,91 трлн сўм билан солиштирганда 27,5 фоизга қисқарганини кўрсатмоқда.

Ҳисобот даврида компаниянинг умумий харажатлари асосан ўтган йил даражасида сақланди — 2,33 трлн сўм, яъни -2,2 фоиз. Шунингдек, сотиш харажатлари 645 млрд сўмни ташкил қилиб, 4,2 фоизга камайган, маъмурий харажатлар эса 755,6 млрд сўмга тенг бўлиб, 4,6 фоизга қисқарган. Бошқа операцион харажатлар эса 935,4 млрд сўмни ташкил этди ва 1,1 фоизга озгина ўсган.

Компаниянинг Ўзбекистон бозоридаги улуши ҳам сезиларли даражада пасайган — 90,2 фоиздан 82,2 фоизга тушиб кетди. Бу эса мамлакатдаги автомобиль бозорида UzAuto Motors компанияси учун рақобатнинг ортиб бораётганини англатади.

Шу билан бирга, компаниянинг биринчи чоракдаги умумий тушумлари 9,7 трлн сўмни ташкил этган. Бу кўрсаткич 2024 йилнинг шу давридаги 11,7 трлн сўм билан солиштирганда 17 фоизга камайганини кўрсатмоқда. Ярим йиллик ҳисоботда компания 637 млрд сўм соф фойда олган. Бу эса 2024 йил I чорагидаги 1,3 трлн сўм соф фойда билан солиштирганда камайган натижани кўрсатмоқда.

Аввалроқ эълон қилинган президент қарорига кўра, UzAuto Motors компанияси 2026 йилнинг биринчи чорагида бозорга чиқарилиши ва оммавий сотувга кириши режалаштирилган. Бу эса компания учун янги босқич, инвесторлар ва автомобил ишлаб чиқарувчилар учун эътиборли имкониятлар очишини англатади.