«Фенербаҳче» сенсацияли равишда Моуриньони истеъфога чиқарди

Туркиянинг машҳур клуби «Фенербаҳче» расмий баёнот орқали бош мураббий Жозе Моуриньо билан шартнома бекор қилинганини маълум қилди.

27 август, чоршанба куни жамоа Чемпионлар лигаси плей-офф босқичида «Бенфика»га қарши баҳсда имкониятдан маҳрум бўлиб, турнирдаги иштирокига барҳам берди.

— 2024/2025 йилги мавсумдан буён жамоамизни бошқариб келаётган Жозе Моуриньо билан хайрлашишга қарор қилдик. Клуб унга «Фенербаҳче» ривожига қўшган ҳиссаси учун миннатдорчилик билдиради ва келгуси фаолиятида омад тилайди, — дея қайд этилди клубнинг матбуот хизмати томонидан X ижтимоий тармоғида эълон қилинган расмий хабарида.

62 ёшли португалиялик мутахассис «Фенербаҳче»ни 2024 йилдан бери бошқариб келаётган эди. Унинг раҳбарлигида жамоа миллий чемпионатда 2-ўринни эгаллаб, мухлислар орасида умид уйғотганди.

Жозе Моуриньо илгари Европанинг энг нуфузли клубларидан «Реал Мадрид», «Челси», «Интер», «Тоттенҳэм» ва «Рома» каби жамоаларда ишлаб, катта тажриба тўплаган.

Муттахассислар фикрича, Моуриньо билан йўлларни ажратиш «Фенербаҳче»нинг яқин келажакдаги йўналиши ва истиқболларига катта таъсир кўрсатиши мумкин. Мухлислар эса клубнинг янги бош мураббийи ким бўлишини қизиқиш билан кутмоқда.