Россияда илк марта чикунгуня безгаги қайд этилди
Россияда 2025 йилнинг дастлабки ҳолати сифатида чикунгуня безгаги аниқланди. Бу ҳақда Роспотребнадзор расмий маълумот берди. Тиббий манбаларга кўра, бемор Шри-Ланкадан Москвага қайтган эркак бўлиб, у ўша ерда 10 кун дам олган.
Мазкур шахс Россияга қайтганидан бир кун ўтгач ўзини ёмон ҳис қилиб, дарҳол шифокорга мурожаат қилган. Дастлаб унда денге вируси бор, деган гумон қилинган. Бироқ чуқур таҳлиллар натижасида чикунгуня вируси тасдиқланган. Айни вақтда бемор инфекцион шифохонада даволанмоқда, унинг ҳолати ўртача оғир деб баҳоланмоқда.
Роспотребнадзор мутаҳассисларининг таъкидлашича, барча зарур эпидемияга қарши чоралар кўрилган ва аҳоли орасида инфекция тарқалиши хавфи йўқ. Чунки чикунгуня касаллиги одамдан одамга юқмайди, балки фақат ҳашаротлар чақиши орқали тарқалади. Россия ҳудудида бу вирусни ташувчи ҳашаротлар сони хавф даражасига етмаган.
Қўшимча қилиб, давлат чегаралари орқали ўтувчи йўловчиларни кузатиш учун «Периметр» махсус тизими жорий этилгани маълум қилинди. Ушбу тизим инфекция белгилари бўлган шахсларни тез ва самарали аниқлаш имконини бермоқда.
Мутасаддиларнинг фикрича, аҳоли ўртасида ҳеч қандай хавотирга ўрин йўқ. Барча профилактика ва назорат чоралари қўлланилмоқда. Чикунгуня безгаги Россияда илк бор қайд этилгани ҳолат сифатида тиббий амалиётда алоҳида қайд этилмоқда.