Дунёнинг энг нуфузли университетларида ўқиётган ўзбек ёшлари сони ошди
Ҳозирги кунга келиб, дунёнинг энг топ олийгоҳларида икки мингдан зиёд ўзбекистонлик ёшлар таҳсил олаётгани маълум бўлди. Бу ҳақда Ўзбекистон мустақиллигининг 34 йиллигига бағишланган маросимда давлат раҳбари Шавкат Мирзиёев хабар берди.
Президент матбуот хизмати хабарига кўра, шуларнинг 750 нафари “Эл-юрт умиди” жамғармаси орқали давлат ҳисобидан молиявий қўллаб-қувватланиб, хориждаги нуфузли университетларда таълим олиш имконига эга бўлмоқда.
Шавкат Мирзиёев қайд этганидек, “Ўтган йили юртимиз ёшлари топ-500 талик олийгоҳларга кириш бўйича Марказий Осиёда биринчи ўринни эгаллагани барчамизни чин дилдан хурсанд қилди. Айниқса, фарзандлари дунёдаги энг нуфузли университетларда таҳсил олаётган ота-оналарнинг қувончини сўз билан баён этиш қийин”, деган фикрни билдирди давлат раҳбари.
Ҳисоб-китоблар ва таҳлилларга кўра, Шавкат Мирзиёев президентликка илк маротаба сайланганидан буён ўтган саккиз йилда республикада олий таълимдаги қамров 9 фоиздан 42 фоизга етказилди. Шу даврда мактабгача таълим муассасаларидаги ўринлар 2,5 миллионга оширилди ва қамров 78 фоизга кўтарилди. Янги мактаблар қурилиши ва мавжудлари кенгайтирилиши ҳисобига қўшимча 1 миллион ўқувчи учун имконият яратилди.
Маълумот учун, “Эл-юрт умиди” фонди 2018-йил сентябрдаги президент фармони асосида тузилган. Ушбу ташкилот ўзбекистонлик ёшларни хориждаги энг нуфузли таълим ва илмий муассасаларда бакалавриат, магистратура ва докторантура дастурлари бўйича таълим олишларини молиявий жиҳатдан қўллаб-қувватлайди. Шу билан бирга, фонд чет элда таълим олган мутахассисларни мамлакатда муносиб ишга жойлашишига кўмаклашиш вазифасини ҳам бажаради.
Фонднинг асосий вазифаларидан бири — кадрларнинг меҳнат фаолиятини мониторинг қилиш, касбий ривожланиши ва мансаб йўлидаги қадамларини қўллаб-қувватлашдир. Бу эса ўз навбатида мамлакатнинг интеллектуал салоҳиятини оширишга ва ривожланишни тезлаштиришга хизмат қилади.
“Эл-юрт умиди” фонди учун 2025-йилда давлат бюджетига 600 миллиард сўм ажратилган. Бу миқдор 2026-йилда 800 миллиард сўмга, 2027-йилда 950 миллиард сўмга, 2028-йилда эса 1 триллион сўмгача оширилиши режалаштирилган. Бу маблағлар ёшлар учун қўллаб-қувватлаш имкониятларини кенгайтириб, уларнинг дунёнинг энг нуфузли олийгоҳларида таълим олишига катта туртки бўлади.