Туркия Исроил билан барча алоқаларни тўхтатди, ҳаво ҳудуди ёпилди

Туркия ташқи ишлар вазири Ҳоқон Фидан Анқара Исроил билан барча иқтисодий ва савдо муносабатларини тўлиқ узганини, шунингдек, мамлакат ҳаво ҳудуди энди Исроил самолётлари учун ёпиқ бўлишини маълум қилди. Унинг сўзларига кўра, турк кемалари ҳам бундан буён Исроил портларига кириши мутлақо тақиқланади.

Парламент йиғилишида сўзга чиққан вазир кескин баёнот берди:
— «Исроилнинг Ғазо сектори, Ливан, Яман, Сурия ва Эронга қарата ўйланмасдан амалга оширган зарбалари бутун халқаро ҳамжамиятга қарши террор ҳужуми ҳисобланади. Бу ҳаракатлар минтақа хавфсизлигига жиддий таҳдид солмоқда», — деди у.

Эслатиб ўтамиз, 2024 йил май ойида Туркия президенти Ражаб Тоййиб Эрдўғон ҳам Ғазо уруши сабаб Исроил билан савдо муносабатлари тўхтатилишини эълон қилганди.

Расмий статистика маълумотларига кўра, 2023 йилда икки мамлакат ўртасидаги товар айирбошлаш ҳажми 6,8 миллиард долларга етган, ундаги улкан улуш — 75 фоизи Туркия экспортига тўғри келган. Исроил матбуотида эса охирги ойларда турк портлари кема эгаларидан Исроилга ҳеч қандай алоқаси йўқлиги ва ҳарбий ёки хавфли юкларни олиб ўтмаётгани ҳақида норасмий сертификат талаб қила бошлагани ҳақида хабар қилинган.

Шунингдек, Эрдўғон ўтган йилнинг 13 ноябрь куниёқ Туркиянинг Исроил билан дипломатик муносабатлари тўхтатилганини расман эълон қилган эди.

Шу тариқа, Анқаранинг янги қатъий қадами икки давлат ўртасидаги муносабатларни мутлақо янгича босқичга олиб чиқди ва минтақа геосиёсий вазиятида катта таҳлилларга сабаб бўлмоқда.