Ровшан Мередов: “Ғалабани қўлга кирита олмадик, аммо хулоса чиқардик”

“CAFA Nations Cup-2025” мусобақасида Туркманистон миллий терма жамоаси биринчи баҳсини Қирғизистонга қарши ўтказди. Беллашувдан кейин бош мураббий Ровшан Мередов ўйин ҳақидаги таассуротлари билан бўлишди.

“Жуда қизиқарли ва курашларга бой ўйин кечди. Биринчи бўлиб гол киритдик, аммо рақиб жуда тез ҳисобни тенглаштирди. Ҳар ҳолда, ҳали ишлайдиган жиҳатларимиз кўп. Кейинги ўйинга қадар бир қатор вазиятларни тўғрилашимиз шарт. Албатта, ғалаба қозониш ниятимиз бор эди, имкониятлар яратдик, лекин улардан фойдалана олмадик. Бу турнир биз учун қайси жиҳатларни қўшишимиз кераклигини кўрсатмоқда. Олдинда Осиё Кубоги саралаш баҳслари кутяпти”, — деди Мередов.

Мураббий шунингдек, рақиб жамоа устози айтган фикрларга ҳам қўшилишини таъкидлади:
“Ростдан ҳам майдоннинг ҳолати тўп билан ҳаракат қилишда таъсир кўрсатди. Бироқ икки жамоа ҳам бир хил шароитда майдонга тушди. Аслида, натижа аниқ — бугун ғалаба қозона олмадик. Агар бошқа майдонда бўлганида, ўйин бутунлай бошқача кечган бўларди. Устунлик қайси жамоа томонида бўлишини айтиб бўлмайди”.

Махсус таъкидлаш керакки, Туркманистон термаси мусобақанинг илк баҳсида ғалабага эришмаса-да, келгуси баҳслар учун муҳим хулосалар чиқаргани билан мухлисларда умид уйғотди.