Қарши бозорида 12 ёшли қизнинг бошига темир тушиб кетди

Қарши шаҳридаги бозорда фожиали ҳодиса содир бўлди. Ижтимоий тармоқларда тарқалган хабарларга кўра, 12 ёшли қизнинг бошига темир тиргак тушиб кетган ва шу оқибатда у жойида вафот этган.

Жорий йилнинг 26 август куни Қарши шаҳри “Оқтепа” МФЙ ҳудудидаги “Орзу” бозори яқинидаги қурилиши тугалланмаган кўп қаватли тураржой мажмуасида меҳнатни муҳофаза қилиш қоидалари бузилган. Шу туфайли, 2013 йилда туғилган У.М.нинг бошига 10-қаватдан бир дона темир тиргак тушиб кетган. Ҳодиса ўша ернинг ўзида ҳалокат билан якунланган.

Ўтказилган дастлабки текширувлар ва суд тиббий экспертизаси маълумотларига кўра, марҳумнинг танасида катта жароҳатлар аниқланган. Унинг бош мия пардаси ва мия қоринчаларига қон қуйилган, бошнинг тепа ва пешона суяклари парчаланиб синиб, асос суягига зарар етган. Шунингдек, чап ўмров ўрта учлигидан синиб силжиши ҳам қайд этилган, ўпкаларга қон қуйилиши натижасида нафас олиш муаммолари келиб чиққан.

Мазкур фожиали ҳолат юзасидан суд криминалистика ва биология экспертизалари тайинланган, Қашқадарё вилояти Камбағалликни қисқартириш ва бандлик бошқармасидан мутахассислар жалб қилинган. Ҳозирда терговга қадар текширув ишлари олиб борилмоқда ва ҳодиса сабаблари аниқланмоқда.

Ҳодиса жойидаги гувоҳлар ва атрофдагиларнинг айтишича, қурилиш объектларидаги хавфсизлик қоидаларига амал қилинмагани шубҳасиз кўзга ташланган. Маҳаллаларда ва бозорларда одамлар орасида тартибсизлик ва хавфсизликка эътибор қаратилмаслиги инсон ҳаётига жиддий таҳдид солиши мумкинлиги яна бир бор намоён бўлди.

Бу фожиали ҳолат ота-оналар, болалар ва маҳаллий аҳоли орасида катта шок ва қайғу уйғотди. Ҳуқуқни муҳофаза қилувчи идоралар ва прокуратура ҳозирда барча маълумотларни йиғиш ва таҳлил қилиш билан шуғулланмоқда, натижада огоҳлантирувчи чоралар қўлланилиши ва шунга ўхшаш фожиаларнинг олди олиниши мақсад қилинмоқда.