АҚШ Фаластин расмийларига виза бермади, можаро авж олди
АҚШ давлат департаменти БМТ Бош ассамблеяси доирасида иштирок этиши кутилган Фаластин делегацияси аъзоларининг визасини бекор қилди. Бу қарор ортидан Фаластин раҳбари Маҳмуд Аббос ва унга ҳамроҳ бўлиши режалаштирилган 80 га яқин расмий сентябр ойида Нью-Йорк шаҳрида бўлиб ўтадиган халқаро йиғилишда қатнашиш имконидан маҳрум бўлди.
Давлат котиби Марко Рубио Фаластин томонини «тинчлик жараёнини издан чиқариш» ва «Фаластин давлатини бир ёқлама тан олишга уриниш»да айблади. Шу билан бирга, давлат департаменти визаларни бекор қилишни «террорчиликни рағбатлантирмаслик сиёсати» билан изоҳлади.
Фаластин томони эса АҚШнинг бу қадамини 1947 йилда қабул қилинган БМТнинг штаб-квартираси тўғрисидаги халқаро келишувга зид, деб баҳолади. Фаластин ташқи ишлар вазири маслаҳатчиси Аҳмад ал-Дик БМТ бош котиби Антониу Гутерриш ва аъзо давлатларни бу масалага жиддий эътибор қаратишга чақирди.
Жаҳон ОАВ ёзишича, АҚШ БМТ бош қароргоҳи жойлашган давлат сифатида ҳар бир мамлакат вакиллари учун тўсиқсиз кириш имкониятини яратиши шарт. Шу боис Вашингтоннинг Фаластинга қарши бу қарорини кўплаб давлатлар танқид остига олмоқда.
Маълумотларга кўра, БМТ Бош ассамблеяси сентябр ойидаги йиғилишида Франция, Буюк Британия, Канада ва Австралия Фаластин давлатини расман тан олиши мумкин. Шу жиҳатдан, АҚШнинг баҳсли қарори Фаластинни давлат сифатида тан олиш жараёнига қарши қадам сифатида ҳам талқин этилмоқда.
Президент Доналд Трамп маъмурияти эса бу билан чегараланмай, параллел равишда Ғазо секторидаги ярадор болаларни қабул қилиш дастурини ҳам тўхтатиб қўйди.
Эслатиб ўтамиз, АҚШ 2023 йил 7 октябридан буён Ғазо секторида давом этаётган ва юз минглаб фаластинликлар қурбонига айланган урушда Исроилни ҳеч қандай шартсиз молиявий, ҳарбий ва дипломатик жиҳатдан қўллаб-қувватлаб келмоқда.
Шунингдек, Вашингтон Фаластин давлатининг тузилишига қатъиян қарши. Ўтган йил 18 апрел куни БМТ Хавфсизлик кенгашида Фаластиннинг тўлиқ аъзолигини кўзда тутувчи резолюцияни ҳам айнан АҚШ вето қилиб йўққа чиқарганди. Кейинроқ БМТ Бош ассамблеясининг навбатдан ташқари йиғилишида ҳам АҚШ Фаластиннинг халқаро ташкилотга тўлиқ қўшилишига қарши овоз берганди.