Больничный түләүләре: ничек исәпләнә һәм Татарстанда аны күпме алырга мөмкин
Сәламәтлеге начарайган очракта татарстанлылар больничныйга китәргә хокуклы һәм ул түләнергә тиеш. Больничный ничек түләнә һәм Татарстанда яшәүчеләр нинди суммага исәп тота ала. Бу хакта тулырак - «Татар-информ» агентлыгы материалында.
Түләү ничек исәпләнә
Түләү күләме хезмәткәрнең эш стажына бәйле:
- әгәр стаж сигез елдан артып китсә - уртача хезмәт хакының 100 проценты исәпләнә;
- биш елдан сигез елга кадәр стаж булганда – 80 проценты;
- стаж биш елдан кимрәк булганда – 60 проценты.
Уртача керем алдагы ике елдагы хезмәт хакыннан чыгып исәпләнә. 2025 елда исәп-хисаплар өчен 2023 һәм 2024 еллардагы керемнәр исәпкә алына. Шул ук вакытта, чикләү дә бар: 2024 елда исәп-хисапка - 2, 225 миллион, ә 2023 ел өчен 1,917 миллион сумнан да артыграк алып булмый.
2025 елда пособиенең минималь күләме аена 22 440 сум тәшкил итә, ә максималь күләме 172 488,69 сумнан артмаска тиеш.
Больничныйны кем түли
Әгәр хезмәткәр авырып киткән яки җәрәхәт алган икән, беренче өч көндә эш бирүче җавап бирә, ә калган көннәрдә Социаль фонд түли. Башка очракларда Россия Социаль фонды түләүләрне тулысынча үз өстенә ала.
Пособие күчерү сроклары
Пособие больничный ябылганнан соң һәм исәп-хисап ясаганнан соң күчерелә. Аның барлык кирәкле документлар тапшырылганнан соң 10 эш көненнән дә соңга калмыйча күчерелүе зарур. Хезмәткәргә пособие түләүдән баш тарткан очракта, бу хакта бер эш көне эчендә хәбәр итәргә тиешләр.