Ҳусанов жароҳат олиб, майдонни тарк этди
Англия чемпионатида кутилмаган натижа қайд этилди. «Брайтон» ўз майдонида амалдаги чемпион «Манчестер Сити»ни 2:1 ҳисобида мағлуб этди. Бу ҳақда Kursiv.media хабар берди.
Учрашувнинг биринчи қисмида «Сити» устунлик қилди. 34-дақиқада Эрлинг Холанд ҳисобни очди, унга Мармуш ёрдам берди. Ҳимоячи Абдуқодир Ҳусанов ҳам бир неча хавфли ҳужумларни бартараф этиб, ўзини кўрсатди.
Бироқ иккинчи бўлимда мезбонлар ўйинга қайтишди. 65-дақиқада Милнер пенальтини аниқ амалга оширди — 1:1. Бироздан кейин Ҳусанов оёғидан жароҳат олиб, Диашга алмаштирилди.
Учрашувнинг 89-дақиқасида Груда гол уриб, «Брайтон»га ғалаба келтирди. Траффорднинг бир неча қутқарувлари «Сити»ни йирик мағлубиятдан асраб қолди.