Жанни Инфантино ЖЧ-2026 учун виза масаласига эътибор қаратди
ФИФА раҳбари Жанни Инфантино ҳозирда Шимолий Америкада бўлиб, 2026 йилги Жаҳон чемпионатига тайёргарлик ишларини яқиндан назорат қилмоқда. Унинг асосий мақсадларидан бири — мусобақага келадиган футбол ишқибозлари сонини кўпайтириш ва улар учун ташриф жараёнини енгиллаштиришдир.
Инфантино айни пайтда Шимолий Америка мамлакатлари билан музокаралар олиб бориб, бошқа давлатлардан келадиган мухлислар учун визани соддалаштириш масаласида келишувга эришишга интилаётганини таъкидлади.
«Клублар ўртасидаги Жаҳон чемпионатига 164 мамлакатдан мухлислар ташриф буюришди. Улар АҚШга бемалол кириш имкониятига эга бўлишди. Албатта, тартиб ва талаблар бўлиши керак, аммо умид қиламанки, Жаҳон чемпионатида қатнашадиган барча давлатлар ўз ишқибозларини таклиф қилиш имконига эга бўлади», – дея қайд этди ФИФА президенти.
Эслатиб ўтамиз, 2026 йилги Жаҳон чемпионати 11 июнда старт олади ва 19 июлга қадар давом этади. Турнир АҚШ, Канада ва Мексикада ўтказилади.