Франсияда сиёсий инқироз: Макрон истеъфога чиқиши мумкин
Франсияда мамлакат президенти Эммануэл Макрон фаолиятига нисбатан янги импичмент жараёни бошланди. Парламентда 104 нафар депутат мазкур ташаббусни қўллаб-қувватлади ва республика президентига нисбатан ишончсизлик масаласини расмий кун тартибига киритди.
“Тарихий воқеа! 10 сентябр куни мамлакат бўйлаб ўтказилган оммавий норозилик намойишларидан кейин 104 депутат экологлар ва коммунистлар билан биргаликда Макронга импичмент эълон қилиш ташаббусини имзолади. Президент ўз лавозимидан истеъфога чиқиши керак”, — деди “Insoumise France” партияси раиси Матильд Пано.
Эслатиб ўтамиз, 10 сентябр куни “Ҳаммасини ёпинг” шиори остида Франция бўйлаб йирик намойишлар бўлиб ўтди. Норозилар ҳукуматнинг иқтисодий сиёсатини танқид қилди ва бюджетни қисқартиришга қарши чиқди. Уларнинг ҳаракатлари кўчаларни тўсиб қўйиш, чиқинди қутиларини ёқиш ҳамда полиция билан тўқнашувларга олиб келди.
Парламентда овоз бериш жараёнида 364 депутат қарши овоз берса, 194 нафар тарафдор овоз билан ҳукуматга ишончсизлик билдирди. Натижада бош вазир Франсуа Байру ҳукумати лавозимидан истеъфога чиқди.
Намойишлардан кейин мамлакатнинг кўплаб шаҳарларида фуқаролар кўча байрамлари ва оммавий йиғилишлар уюштирди, бу эса сиёсий вазиятнинг аҳолининг диққатини жалб қилаётганини кўрсатди. Ҳозирда мамлакатдаги сиёсий инқирознинг ривожланиши ва Макроннинг лавозимда қолиши ёки истеъфога чиқиши аҳолининг ва халқаро ҳамжамиятнинг эътиборида.