Татарстаннан 300дән артык студент «Студентлар стартабы» бәйгесендә җиңде

Татарстаннан 348 студентның гаризасы «Студентлар стартабы» бәйгесенең алтынчы чиратында җиңде. Республика катнашу өчен тапшырылган проектлар саны буенча лидерларның берсе булды. Җиңүчеләр исемлеген Россия Хөкүмәте чыгарды.

Бәйгене уздыра торган университет технология эшмәкәрлеге платформасын 2022 елда Россия Мәгариф министрлыгы эшләтеп җибәрде. Ул «Нәтиҗәле конкурентлыкка сәләтле икътисад» илкүләм проектының «Технологияләр» федераль проектының бер өлеше булып тора.

Мәсәлән, Татарстан студентлары сәламәтлек үзенчәлекләренә бәйле рәвештә, азык-төлек продуктларының куркынычын ачыклый торган кушымта булдыру, туфракта азотны саклауның яңа ысулын уйлап табу, укыту, тавыш яздыру һәм яшь музыкантларны чыгару өчен цифрлы экосистема булдыру өчен һәрберсе 1 млн сум алачак.

«Быел Татарстаннан 348 проект «Студентлар стартабы» бәйгесендә җиңде. Бу проектларның яртысы технологик үсеш буенча илкүләм проектларның төп юнәлешләренә бәйле. Бу чаралар Россиянең технологик лидерлыгы юлына мөһим адым булып тора, чөнки алар перспективалы фәнни эшләрне коммерцияләштерә торган эшмәкәрләр санын арттырырга этәргеч бирә», – дип сөйләде Татарстан икътисад министрының беренче урынбасары Наталья Кондратова.

Алтынчы чират кысаларында барлыгы 2,5 мең җиңүче сайлап алынган. Алар арасында Россия гражданнары да, шулай ук безнең ил югары уку йортларында укучы 11 ил вәкилләре дә бар. Гаризалар җиде юнәлеш буенча кабул ителгән.