Австралияда номаълум астероид изларига янги илмий исботлар топилди
Австралияда илм-фан учун илгари номаълум бўлган астероиднинг излари топилди, деб хабар берди “Earth and Planetary Science Letters”. Кашфиёт космик зарбаларда ҳосил бўладиган табиий шиша — тектитларнинг музейдаги намуналарини қайта таҳлил қилиш орқали амалга оширилди. Мутахассислар таркиби ўзига хос, ёши тахминан 11 миллион йил бўлган илгари қайд этилмаган турдаги тектитларни аниқлади.
Олимлар уларни машҳур Австралазия сочилма майдонидаги тектитлар билан солиштирди: ўша намуналар қарийб 780 минг йиллик бўлиб, ер юзи миқёсида кенг тарқалган; янги топилмалар эса тахминан 15 баравар қадимий ва чекланган ҳудудга тегишли. Бу улар бошқа космик ҳодиса натижаси эканини кўрсатади. Шу билан бирга, зарба натижасидаги аниқ кратер ҳали топилмади.
Тадқиқотчилар таъкидлашича, қадимги астероид урилишларининг частотаси ва қувватини ўрганиш келгуси хатарларни баҳолаш ҳамда сайёрани ҳимоя қилиш механизмларини ишлаб чиқишда ҳал қилувчи аҳамият касб этади. Эслатиб ўтамиз, шу йил ерга энг йирик астероидлардан бири яқинлашиб, ой ёнидан тахминан 800 минг км масофада хавфсиз учиб ўтгани хабар қилинганди.