Илмий ютуқ: Маскнинг чипи фикрларни матнга айлантиради
Илон Маскга тегишли Neuralink компанияси инсон онгидаги фикрларни ёзма шаклга ўтказиш имконини берувчи янги технологияни синовдан ўтказишга тайёрланмоқда.
Лойиҳа доирасида нутқида муаммоси бўлган кўнгиллиларга сунъий интеллект билан ишлайдиган махсус чип ўрнатилади. У миядан чиқадиган электр сигналларини қабул қилиб, ташқи қурилмаларга узатади ва уларни матнга айлантиришга ёрдам беради.
Мутахассисларнинг айтишича, имплантлар оғир касалликдан кейин тирик қолган, аммо оғиз ва нутқ ҳаракатларини назорат қилиш имкониятини йўқотган беморлар учун мўлжалланган. Улар соғлом фикрлай олади, лекин сўзларни овозли ифода этишда қийналади.
Neuralink’нинг ушбу ташаббуси сўзлай олмайдиган инсонларга ўз фикрларини эркин билдириш имкониятини тақдим этиши мумкин.