Трамп Чикагога миллий гвардия юборишни буюрди
АҚШ Президенти Доналд Трамп Чикагодаги жиноятчиликни назорат қилиш учун 300 нафар миллий гвардиячини юборишни маъқуллади. Унга кўра, шаҳар хавфсизлиги издан чиққан. Қарор иммиграция ходимлари ва намойишчилар ўртасидаги тўқнашувдан сўнг қабул қилинди.
Иллинойс губернатори Жей Би Притскер бу ҳаракатни “ваколатни суиистеъмол қилиш” деб атади. Унинг фикрича, президент штат розилигисиз ҳарбий куч юборишга ҳақли эмас. Орегон штатида ҳам шунга ўхшаш қарор вақтинча тўхтатилган эди.
Оқ уй бу чорани “федерал ходимлар ва давлат мулкини ҳимоя қилиш учун зарур” деб тушунтирди. Трамп тартибсизликлар фонида тинчликни тиклашни мақсад қилганини билдирди.
Ҳозирча гвардиячилар шаҳарга етиб келган-келмаганлиги номаълум. Мутахассислар бу қарор Чикагода сиёсий баҳсларни кучайтириши мумкинлигини айтмоқда.