Смртта на затвореничките ги разгорува повиците за затворање на „озлогласениот“ женски затвор во Иран
Затворот Карчак е основан во 2010 година и оттогаш е санкциониран од Соединетите Држави и Европската Унија.
Озлогласениот затвор Карчак, сместен во пустина надвор од Техеран, долго време служи како мрачен симбол на репресија во Иран.
Сега, смртта на неколку затворенички повторно ги разгоре повиците до властите да го затворат објектот, за кој се верува дека е еден од најголемите женски затвори во светот.
Властите ги бранеа условите во објектот, па дури и зборуваа за неговите погодности.
Но, поранешните затворенички велат дека затворот „страда“ од сериозна пренатрупаност, лоши санитарни услови и акутен недостиг на медицинска грижа.
Групите за човекови права го припишуваат медицинското занемарување како главна причина за смртта на три затворенички во изминатиот месец.
Како одговор, околу 150 поранешни затворенички во заедничка изјава на 29 септември ги осудуваат „систематските“смртни случаи на затворенички во Карчак и бараат затворање на затворот.
Иранската адвокатка за човекови права Насрин Сотудех, која отслужила казна во Карчак, за Радио Фарда на Радио Слободна Европа изјави дека затворот е „непогоден за живеење“.
Откако долго време се залагаше за негово затворање, Сотудех првично бараше начини за реформирање на објектот, но на крајот заклучи дека треба да се затвори.
Фоторепортерката и активистка за права Алиех Моталебзадех, која интервјуирала поранешни затвореници, рече дека многу затворенички се жалеле на скорпии и змии во објектот.
Моталебзадех, зборувајќи за Радио Фарда, ги обвини судските службеници, затворските власти и медицинскиот персонал дека „не покажуваат почит кон затвореничките“.
Таа истакна дека властите веруваат дека жените во објектот заслужуваат да бидат малтретирани.
Кога Израел го бомбардираше затворот Евин во Техеран за време на дванаесетдневната војна со Иран во јуни, десетици затворенички таму беа префрлени во Карчак.
Но, многу од овие затворенички остануваат во Карчак, и покрај повторното отворање на затворот Евин, укажуваат групите за човекови права.
Сотудех вели дека држењето на затворениците во Карчак е „одмазда“ кон жените, кои одиграа клучна улога во невидените протести против естаблишментот што ја потресоа земјата во 2022 година.
Обновените повици за затворање на затворот Карчак дојдоа по низа смртни случаи во објектот, за кој се верува дека има неколку илјади затвореници и е санкциониран од САД и Европската Унија.
Иранската активистка Сомаје Рашиди, етикетирана како политички затвореник од повеќе групи, почина во Карчак на 25 септември.
Смртта на 42-годишната жена се случи 10 дена откако таа доживеа неколку напади, а по што другите затворенички во ќелијата и организациите за човекови права ги обвинија властите дека не ѝ обезбедиле потребна грижа на жената.
Една од затвореничките во ќелијата на Рашиди за Радио Фарда изјави дека „имала епилепсија, постојани напади и страдала од силни главоболки, и секој пат кога одела кај затворскиот лекар, ѝ кажувале дека е неухранета и ја враќале на одделението“.
Судабе Асади, која беше затворена за финансиски прекршоци, почина во Карчак на 16 септември откако се разболела и ѝ била одбиена специјализирана медицинска нега надвор од затворот.
Сомаје Рашиди, која исто така беше затворена поради финансиски обвиненија, почина откако ѝ беше одбиен навремен третман и покрај предупредувачките знаци дека се работи за срцев удар.