"Монако" рулини Поконьолига ишонди: ёш мураббийга катта синов
“Монако” расман 38 ёшли бельгиялик мутахассис Себастьян Поконьолини бош мураббий этиб тайинлади. У 10 октябрь, жума куни жамоа билан хайрлашган австриялик Ади Хюттернинг ўрнини эгаллади.
Футболчилик даврида Поконьоли “Генк”, “AZ Алкмаар”, “Стандард”, “Ганновер”, “Вест Бромвич”, “Брайтон” ва “Унион” каби клубларда ҳимоя чизиғида ишончли ўйинлари билан танилган.
Мураббийлик фаолиятини 2021 йилда “Унион”нинг ёшлар таркибида бошлаган бельгиялик мутахассис кейин “Генк” академияси ҳамда Белгия U18 термасига бош-қош бўлди. 2024 йил ёзидан эса “Унион”нинг асосий жамоасини бошқариб келаётган эди.
Эндиликда Поконьолини “Монако”да жиддий вазифалар кутмоқда: таркибни мувозанатлаш, ёшлар билан ишлаш ва натижани барқарорлаштириш. Клуб раҳбарияти янги мураббийдан замонавий ўйин услуби ва жамоанинг юқори поғоналар учун курашини талаб қилмоқда.
Князлик клуби учун янги саҳифа бошланди — Поконьолининг жасорати ва ғоялари “Монако”ни янги марраларга олиб чиқишга хизмат қилиши кутилмоқда.