Мбаппе: «Месси мени майдонда фикрлашга ўргатди»

«Реал Мадрид» ҳужумчиси Килиан Мбаппе яқинда берган интервьюсида «ПСЖ»даги хотираларини эслаб, у ерда Лео Месси билан бирга тўп сурган даврни ҳаётидаги энг ёрқин лаҳзалардан бири сифатида тилга олди. Ҳозирги кунда Месси АҚШнинг «Интер Майами» жамоаси сафида фаолият олиб бормоқда.

«Футбол тарихи ҳақида сўз кетганда, шубҳасиз, Месси номи дарҳол ёдга тушади. У кийиниш хонасида ҳам жуда оддий, самимий инсон эди. Машҳурлик одамни ўзгартириши мумкин, лекин Лео бундай эмасди — у ҳамиша камтарин, ҳурматли ва самимий бўлиб қолди», — деди Мбаппе.

Франциялик юлдузнинг таъкидлашича, Месси билан бир жамоада бўлиш унга нафақат катта тажриба, балки ўйинни чуқурроқ англаш имконини ҳам берган.

«Футболчи сифатида у беқиёс эди. Агар жамоангизда шундай инсон бўлса, ҳар бир ҳаракатини ўрганишга арзийди. У менга майдонда тўп билан қандай фикрлашни ўргатди», — дея қўшимча қилди у.

Мбаппе, шунингдек, Месси билан бирга ўйнашни орзу ҳам қилмаганини таъкидлади:

«Мен ҳар доим Лео бутун умрини “Барселона”да ўтказади деб ўйлардим. Мен эса “Реал” сафида тўп суришни орзу қилганман. Аммо тақдир шундай бўлдики, у билан бир жамоада бўлиш имкони менга насиб этди. Бу мен учун ҳақиқий шараф ва устига-устак, ноёб тажриба бўлди».

Мбаппе суҳбатни шундай якунлади:

«Мен Мессига фақат миннатдорчилик билдиришим мумкин. У билан бирга ўйнаш менинг фаолиятимдаги энг катта имкониятлардан бири эди».