Ўзбекистон – Уругвай учрашуви: кучли рақибга қарши муносиб ўйин

Бугун, 13 октябрь куни Ўзбекистон Миллий терма жамоаси Малайзияда халқаро ўртоқлик ўйинида Жанубий Америка гранди — Уругвайга қарши майдонга тушди. Қаттиқ курашларга бой баҳсда рақиблар 2:1 ҳисоби билан ғалаба қозонди.

Учрашувдаги ҳисобни уругвайлик Факундо Торрес очди, кейин эса Жанубий Америка жамоаси аъзоси Хуан Мануэл Санабриа иккинчи голни урди. Ўзбекистон жамоаси сафида эса Русланбек Жиянов жавоб голини киритиб, натижани қисқартирди. Унинг фаол ҳаракатлари ўйиндаги энг ёрқин паллалардан бири бўлди.

Беллашув статистикаси ҳам ўйиннинг динамикасини акс эттиради:

• Тўп назорати — Ўзбекистон 43%, Уругвай 57%

• Голли вазиятлар — Ўзбекистон 2, Уругвай 3

• Дарвоза томон зарбалар — Ўзбекистон 7, Уругвай 13

• Сейвлар — Ўзбекистон 2, Уругвай 1

• Бурчак зарбалари — Ўзбекистон 2, Уругвай 6

• Паслар — Ўзбекистон 341, Уругвай 445

• Тўпни олиб қўйишлар — Ўзбекистон 8, Уругвай 18

Жамоамиз таркибдаги футболчилар ўз имкониятларидан келиб чиқиб ҳаракат қилишди. Sofascore платформаси ўйинчиларга қуйидаги рейтингларни берди:
Абдувоҳид Неъматов — 6.5, Муҳаммадқодир Ҳамролиев — 6.5, Рустам Ашурматов — 6.7, Умарбек Эшмуродов — 6.9, Ҳожиакбар Алижонов — 6.3, Акмал Мозговой — 6.5, Отабек Шукуров — 6.5, Шерзод Насруллаев — 6.9, Азиз Ғаниев — 6.7, Элдор Шомуродов — 6.8, Ҳожимат Эркинов — 6.2.

Заҳиратдан майдонга тушган футболчилар ҳам жамоага ёрдам берди:
Азизбек Турғунбоев — 6.6, Русланбек Жиянов — 7.4 (жамоамизнинг ягона голи), Абдурауф Бўриев — 6.6, Ҳусайн Норчаев — 6.5, Дилшод Саитов — 6.5, Игор Сергеев — 6.5.

Ушбу баҳс орқали Ўзбекистон термаси халқаро майдондаги тажрибасини янада бойитди. Уругвай каби кучли рақибга қарши ўйин фақат натижа эмас, балки келгуси мусобақалар учун муҳим тажриба сифатида ҳам қадрланади.

Шомуродов ва жамоадошлари бу ўйинда юқори даражада ҳаракат қилиб, мухлисларга келажакка умид бағишлади.