Стотина повредени во судир на два воза во Словачка

Најмалку 100 лица се повредени во судирот на два воза што се случи денеска (13 октомври) во близина на селото Јаблонов, во Турња, Словачка, објавија локалните медиуми.

Несреќата се случила околу 10 часот, на местото каде што се вкрстуваат две железнички пруги. Поради силата на ударот, вагоните излетале од шините, а едниот од нив останал да виси над длабок ров.

Портпаролот на словачката железничка компанија, Јан Бачек, изјави дека причината за судирот сè уште се истражува.

„Приоритет во моментов е спасувањето и евакуацијата на патниците и нашите вработени“, изјави Бачек.

На местото на настанот биле испратени пет амбулантни возила и еден спасувачки хеликоптер.

Полицијата изјави дека судирот се случил пред тунелот и дека патниците постепено ги напуштаат возовите.

Како што е најавено, полицијата го обезбедува местото на несреќата, ја координира работата на спасувачките служби и го насочува движењето на луѓето во областа.