Электр қармоқ билан балиқ тутган икки фуқаро жавобгарликка тортилди

Сирдарё вилоятида икки фуқаро электр қармоқ ёрдамида балиқ овлаётган пайтда қўлга олинди. Улар ҳайвонот дунёсига 350 миллион сўмдан ортиқ зарар етказгани маълум бўлди. Бу ҳақда Экология ва иқлим ўзгариши вазирлиги маълум қилди.

Маълумотларга кўра, вазирлик ва ҳуқуқни муҳофаза қилувчи органлар ҳамкорлигида ўтказилган рейд давомида Гулистон тумани “Баҳмал” маҳалласида фуқаролар А.Т. ва М.Д. “Шўразак” зовурида электр қуролидан фойдаланиб, 37 дона балиқни ноқонуний равишда овлаган. Улар овланган балиқларни резина қайиқ орқали олиб чиқиш пайтида тўхтатилган.

Текширув жараёнида улардан 1 дона электр қармоқ, аккумулятор, қайиқ, эшкак ва тунги ёритиш мосламаси далил сифатида олиб қўйилган.

Мутахассисларнинг ҳисоб-китобига кўра, уларнинг ҳаракати табиатга 352 миллион сўмдан ортиқ зарар етказган. Бу билан “Ов қилиш ва овчилик хўжалиги тўғрисида”, “Ҳайвонот дунёсини муҳофаза қилиш ва ундан фойдаланиш тўғрисида” ҳамда “Табиатни муҳофаза қилиш тўғрисида”ги қонунлар бузилган.

Ҳолат бўйича ҳужжатлар ҳуқуқий баҳо бериш учун Сирдарё вилояти прокуратурасига юборилган. Мутахассислар аҳолини ноқонуний балиқ овлашдан қатъиян тийилишга ва табиатни муҳофаза қилиш қоидаларига амал қилишга чақирмоқда.