Александр Хомяков: «Ҳар бир баҳс биз учун финалга тенг»
Суперлиганинг 26-туридан ўрин олган «Бухоро» — «Сўғдиёна» (2:0) учрашувидан сўнг жамоа бош мураббийи Александр Хомяков матбуот анжуманида иштирок этиб, беллашув ҳақидаги фикрлари, жамоа ҳолати ва Кубок финали олдидан тайёргарлик ҳақида очиқ суҳбат қилди, деб хабар берди championat.asia.
«Ўйин осон кечмади. Мавсум охирига келиб ҳар бир баҳс жуда мураккаб тус олмоқда, чунки барча жамоаларга очко зарур. Ҳар бир клуб ўзи учун муҳим натижа излаяпти, шу боис майдонда ҳеч кимга енгил бўлаётгани йўқ. Бизда ҳам осон ўйин йўқ. Шогирдларимга бор кучини бергани учун миннатдорман. Биринчи бўлимда жуда яхши ҳаракат қилдик, икки гол уриб олдик. Иккинчи бўлимда эса ҳисобни сақлаб қолишга кўпроқ эътибор бердик, бу эса табиий. Ҳатто айрим дақиқаларда устунликни рақибга бериб қўйдик, аммо интизом ва характер ҳисобига натижани сақлаб қолдик», — деди Хомяков.
Мураббий Иззатилло Пўлатовнинг иккита голи ҳақида ҳам фикр билдирди:
«Бу олдиндан ишланган махсус тактика эмас, лекин биз унга ҳужумларга фаол қўшилиш имкониятини берган эдик. У бу имкониятдан аъло даражада фойдаланди. Иззатилло тўғри қарорлар қабул қилди ва ўнг қанотдан ҳужумларга яқинлашиб, жамоага ғалаба келтирди. Бу унинг меҳнатининг натижаси», — деди у.
Шу билан бирга, Хомяков «Бухоро»нинг фақат бир бўлимда фаол ўйнаётгани ҳақидаги саволга ҳам жавоб берди:
«Бу ҳақиқат. Бизнинг жамоа ҳозирги шароитда фақат бир тайм давомида юқори темпни ушлаб тура оляпти. Интенсивликни охиригача сақлаш жуда қийин. Сабаблар бор — жисмоний чарчоқ, қисқа захира, турли жароҳатлар. График ҳам тиғиз, бу ҳам таъсир қилмоқда. Лекин биз ҳар бир вазиятдан чиқиш йўлини излаяпмиз, вазиятни яшириш ниятимиз йўқ», — деди мураббий.
Кубок финалидаги рақиб ҳақида сўралганда Хомяков шундай жавоб берди:
«Мени хабардор қилишича, “Пахтакор” бугун Хоразмда иккинчи таркиби билан ўйнаган. Биз эса уларни кузатиш учун ҳеч кимни юбормадик. Нега десангиз, XXI асрда яшаяпмиз — рақибни ўрганиш учун майдонга бориш шарт эмас. Видео таҳлиллар, маълумотлар етарли. Шунингдек, биз “суперклуб” эмасмиз, бирортани хизмат сафарига юбориш учун ҳам ресурсимиз чекланган. Ҳозирча ўз муаммоларимизни ҳал қилишга диққат қаратяпмиз».
Жамоа Кубок финалига кучни асраб қўйдими, деган саволга у қуйидагича жавоб берди:
«Биз ўйин танламаймиз. Футболчиларга “бугун секин ўйнанглар, эртага муҳим баҳс” деб айта олмайман. Ҳар бир баҳс — биз учун финал. Шунинг учун ҳар сафар бор куч билан ҳаракат қиламиз. Мен сеҳргар эмасман, финалда нима бўлишини олдиндан айта олмайман, аммо ишонч билан айтаманки, жамоа майдонга ғалаба учун тушади».
Анжуман якунида мураббий мухлисларга ҳам мурожаат қилди:
«Биз учун ишқибозларнинг қўллаб-қувватлаши жуда муҳим. Уларнинг энергияси футболчиларга куч беради. Кубок финалида Бухоро намоёни бўлишимиз учун бор имкониятни ишга соламиз. Биз жамоа сифатида курашамиз, мухлислар эса руҳий жиҳатдан биз билан бўлишсин», — деди Александр Хомяков.
Бу сўзлардан кейин жамоа атрофида янада ижобий муҳит яратилди. Мухлислар жамоани қўллаб-қувватлашга тайёр, чунки бу “Бухоро” учун нафақат Кубок йўли, балки клуб тарихида янги саҳифа очиш имконияти ҳамдир.