“Барса”нинг собиқ юлдузи Ракитич "Эл-Класико" олдидан фикр билдирди
Жаҳон футболидаги энг шиддатли ва кўпчилик интиқлик билан кутган баҳслардан бири — “Эл-Класико” арафасида “Барселона”нинг собиқ юлдузи Иван Ракитич ҳам ўз фикрини билдирди. Хорватиялик собиқ ярим ҳимоячига кўра, бу ўйин нафақат Испания, балки бутун дунё футбол ишқибозлари учун байрамга айланган ҳолатда ўтади.
“Эл-Класико” — бу футболдаги энг юқори даражадаги тўқнашув. Унда ҳар бир футболчи иштирок этишни орзу қилади. Бу нафақат жамоаларнинг тарихий рақобати, балки майдондаги ҳар бир ҳаракат ортида ғурур, ирода ва меҳр борлигини англатади. Ҳозирги шароитда иккала жамоага ҳам ғалаба жуда зарур. Шу сабабли, бу сафарги ўйин ҳар доимгидек кескин, драматик ва эҳтиросли бўлади, — деди Ракитич журналистлар билан суҳбатда.
Хорватиялик футболчи айтишича, “Барселона” ва “Реал” ўртасидаги ҳар бир учрашувда тарих ёзилади.
“Мен бу баҳсларда қатнашганимни фахр билан эслайман. Ҳар бир ўйин олдидан бошқача ҳиссиётлар бўлади — жамоа ва мухлислар фақат ғалабани кутган паллада бошқача юрак урғуси билан майдонга чиқасан. “Эл-Класико” — бу футболнинг жони, унинг тантанаси”, — дея қўшимча қилди у.
Ракитич таъкидлашича, бу галги баҳс ҳам турнир жадвали нуқтаи назаридан катта аҳамият касб этади. Ҳозирда Ла Лиганинг юқори қисмида рақобат ниҳоятда кучли — бир очко ҳам катта аҳамиятга эга. “Шундай пайтда ҳар бир хато ғалабани қўлдан чиқариши мумкин. Иккала жамоа ҳам буни яхши билади. Шу боис, биз шиддатли, жонкуяр ва тактик жиҳатдан мукаммал ўйинни кутяпмиз,” — деди у.
Маълумот учун, Иван Ракитич “Барселона” сафида 2014 йилдан 2020 йилгача ҳаракат қилган. У даврда каталонияликлар билан бир қаторда Испания чемпионлиги, Кубок ҳамда Чемпионлар лигаси ғалабаларини қўлга киритган. Жорий йилнинг июль ойида эса у футболчилик фаолиятини якунлаганини маълум қилган эди.
“Мен “Барселона”да ўтган йилларимни умримнинг энг ёрқин даври деб ҳисоблайман. Аммо эндиликда мухлис сифатида томоша қиламан ва шундай баҳсларда икки жамоа ҳам ўз жонкуярлигини намоён этсин, деб тилайман. Футбол мана шундай эҳтирослар билан чиройли,” — дея хулоса қилди Ракитич.
Эслатиб ўтамиз, “Эл-Класико” 26 октябрь куни бўлиб ўтади. Учрашув Тошкент вақти билан соат 20:15 да старт олади. Бу баҳс яна бир бор футбол оламининг диққат марказига айланиши шубҳасиз.