Ҳиндистонда “Гўзаллик салони” ортида фоҳишалик тармоғи яширингани фош бўлди ва унинг қурбони ўзбек аёли

Ҳиндистоннинг Ҳайдаробод шаҳрида ўтказилган тезкор рейд чоғида одам савдоси билан шуғулланган жиноий гуруҳ қўлга олинди, деб хабар берди.

Рейд натижасида уч нафар аёл, жумладан, бир ўзбекистонлик фуқаро ҳам озод этилган. Улар юқори даромадли иш ваъдаси билан бу мамлакатга жалб этилган, аммо кейин жинсий эксплуатацияга мажбурланган.

Тергов маълумотларига кўра, жиноят схемасини “Style Maker” гўзаллик салони собиқ эгаси — 36 ёшли Шариф исмли эркак ташкил этган. У ишсиз аёлларни ижтимоий тармоқларда топиб, уларни турли баҳоналар билан Ҳайдарободга олиб келган.

Полиция Банжара Ҳиллс туманидаги меҳмонхонага рейд ўтказиб, 5950 рупий нақд пул, 13 дона мобил телефон ва бошқа ашёвий далилларни мусодара қилган. Шунингдек, ташкилотчи, меҳмонхона ходимлари ва етти мижоз қўлга олинган.

Ҳуқуқни муҳофаза қилувчи органлар аёлларнинг хавфсизлигини таъминлаш учун уларни тиббий ва психологик кузатув остига олган. Расмийлар ўзбекистонлик аёлни тез орада ватанга қайтариш бўйича ҳамкорликни бошлаган.

Бу воқеа яна бир бор хорижда “иш” топиш ниятида чалғиган аёлларни огоҳлантиради — ёлғон ваъдалар ортида инсон савдоси турган бўлиши мумкин. Жамиятнинг бундай жиноятларга бефарқ бўлмаслиги эса ҳар бир инсоннинг ҳаётини асраш демакдир.