“Гул нақшли шляпа кийган аёл” — Пикассонинг асари 37 млн долларга кетди

Парижда ўтказилган аукционда Пабло Пикассонинг “Гул нақшли шляпа кийган аёл бюсти (Дора Маар)” номли асари 37 миллион долларга сотилди, деб хабар берди “Associated Press”.

Асар аукционга дастлаб 9–11,6 миллион доллар орасида баҳоланган ҳолда қўйилган эди, аммо якунда кутилган нархдан тўрт баравар қимматга сотилди. Бу расм машҳур рассомнинг илҳом манбаи ва севгилиси бўлган Дора Маарнинг портретидир.

Пикассо бу асарни 1943 йил июль ойида яратган. Орадан бир йил ўтиб, у хусусий коллекцияга ўтган ва 80 йил давомида шахсий қўлларда сақланган. Мутахассислар асарнинг сақланиш ҳолатини “мукаммал” деб баҳолаган.

Дора Маарнинг ўзи ҳам рассом ва фотограф бўлган. Унинг Пикассо билан муносабатлари 1936 йилдан 1945 йилгача давом этган.

Санъат танқидчилари таъкидлашича, бу асар нафақат Пикассонинг севги ва илҳом даврини ифода этади, балки у яратган иккинчи жаҳон уруши йилларидаги психологик ҳолатини ҳам намоён қилади.