Трамп Ресейдің жағалауында АҚШ-тың атом сүңгуір қайығы барын еске салды
АҚШ президенті Дональд Трамп Ресейдегі "Буревестник" құрлықаралық зымыранының жуырдағы сынақтарына пікір білдірді, - деп хабарлайды Tengrinews.kz тілшісі Ақ үйдің аудио-хабарламасына сілтеме жасап.
Трамп АҚШ-тың Ресей жағалауында атом сүңгуір қайығы бар екенін еске салды және мұны "олардың" білетінін айтты.
"Олардың жағалауында дәл қазір тұрған әлемдегі ең үздік атом сүңгуір қайық барын біледі. Сондықтан бізге зымыранның 8 мың миль ұшуының қажеті жоқ. Олар бізбен, біз де олармен ойнамаймыз. Біз үнемі зымыран сынақтарын өткізіп тұрамыз, бірақ айтқанымдай, бізде атом суасты қайығы бар, бізге ондай қашықта атудың қажеті жоқ. Айтпақшы, Путиннің мұндай мәлімдемелер жасауы орынды деп санамаймын. Ол бір апта ғана созылуға тиіс соғысты аяқтауы керек еді, бірақ бұл төртінші жылға таяп қалды. Сондықтан оның айналысатын ісі зымыран сынақтары емес", - деді АҚШ президенті.
Бұған дейін ресейлік БАҚ "Буревестник" сынағы 21 қазанда өткенін хабарлаған: зымыран 14 мың шақырым қашықты бағындырып, шамамен 15 сағат әуеде болған. Олардың айтуынша, ол қозғалтқышына орнатылған шағын ядролық реактордан қуат алады, бұл оған теориялық тұрғыда бірнеше күн бойы әуеде қалуға мүмкіндік береді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!