Месси Интер Майами билан шартнома узайтирди
Америка футбол клуби "Интер Майами" жамоа сардори Лионел Месси билан шартномани 2028 йилги мавсум охиригача узайтирганини расман эълон қилди. Илгари тузилган шартнома 2025 йилнинг 31 декабрида ўз ниҳоясига етиши керак эди.
"Бу ерда қолганимдан ва ушбу лойиҳа устида ишлашни давом эттираётганимдан жуда хурсандман. Бу лойиҳа менинг орзуйим ва гўзал ҳақиқатимга айланди.
Майамига келганимдан буён ўзимни бахтли ҳис қиламан, шунинг учун фаолиятимни бу ерда давом эттиришдан мамнунман", — деди Месси ўз изоҳида. Месси "Интер Майами" сафида 2023 йил ёзидан буён тўп суради.
Шу вақт мобайнида у 2023 йилги Leagues Cup, 2024 йилги MLS мунтазам мавсумида ғолиб бўлишга эришди ҳамда АҚШ Кубоги финалига етиб борди. Аргентиналик футболчи клуб сафида 82 та ўйинда майдонга тушиб, 71 та гол урди ва 37 та голли узатма амалга оширди.
Мессининг сўзларига кўра, "Интер Майами" унинг фаолиятидаги сўнгги клуб бўлади. Лионел Месси 1987 йил июн ойида Аргентинанинг Росарио шаҳрида туғилган.
У асосан "Барселона"даги фаолияти билан катта шуҳрат қозонган.