Арсен Венгер: “Барса” тишсиз бўлди, “Реал” эса Алонсо тактикаси билан ғалаба қилди
“Арсенал” клубининг афсонавий собиқ бош мураббийи Арсен Венгер "Эл Класико" ҳақида фикр билдирди, деб ёзди Marca. Унинг таъкидлашича, “Реал Мадрид”нинг бу галги ғалабаси тасодиф эмас — жамоа аниқ тактик режа ва руҳий барқарорлик орқали ғалаба қозонган.
“Хаби Алонсо бугунги кунда жуда пухта ишлаяпти. У “Реал”ни мувозанатга келтира олди ва жамоа майдонда ҳар бир позицияда аниқ вазифа билан ҳаракат қилди. Ҳозирги “Реал” айрим жиҳатларда “Барселона”дан анча тартибли ва ҳиссиётли ўйнади”, — деди Венгер.
Мутахассиснинг сўзларига кўра, мадридликлар биринчи навбатда ҳимояда ўта ишончли тузилма яратган. ““Реал”нинг ҳимоя чизиғи катта фарқ билан “Барселона”никидан устун эди. Улар рақибга ҳеч қандай бўшлиқ қолдирмади. Ҳужумда эса ҳар бир вазиятда гол уриш эҳтимоли юқори кўринди”, — деб таъкидлади у.
Каталонияликларнинг ҳужумдаги ҳаракатларини эса Венгер унчалик самарали деб баҳоламади. Унинг фикрича, Левандовски ва Рафиньянинг йўқлиги “Барса”ни жиддий заифлаштирган. “Каталонлар ҳужумда тишсиз бўлиб қолди, рақиб ҳимоясини синдиришда аниқлик етишмади. Мбаппенинг пенальтидан фойдалана олмагани вазиятни янада кескинлаштирди, аммо “Барса” шундан кейин ҳам хавфли кўринишга эга бўлмади”, — деди у.
Венгер Хаби Алонсо ишини алоҳида олқишлаб, унинг жамоага сингдирган интизоми ва мувозанатини эътироф этди. “Алонсо “Реал”нинг ҳимоя чизиғини жуда аниқ мувозанатга келтирган. Бу жуда катта маҳорат талаб қилади. Ҳозирда ҳар бир мураббий ўз жамоасини руҳлантириш ва тартибга солиш устида ишлаяпти. “Реал” бу борада бошқалардан бир қадам олдин”, — дея фикр билдирди франциялик мутахассис.
Венгер фикрича, "Эл Класико" ҳар икки жамоа учун ҳам фақат натижа эмас, балки психологик синов бўлди. “Бу икки клуб доимо олий мақсадлар учун курашади. Улар учун ҳар бир "Эл Класико" — янги босқичнинг бошланиши”, — деди у.
Маълумот учун, Ла Лиганинг 10-туридан сўнг “Реал Мадрид” 27 очко билан мусобақа жадвалида пешқадамликни сақлаб қолган бўлса, “Барселона” 22 очко билан иккинчи ўринда бормоқда.
Шу тариқа, Венгернинг таҳлилига кўра, бу сафар ғалаба “Реал”нинг тактик тартиб ва ички уйғунликни тўлиқ топганидан далолат беради. Алонсонинг иш услуби нафақат мухлислар, балки футбол дунёсидаги мутахассислар томонидан ҳам юқори баҳоланмоқда.