“Эл-Класико”дан кейин Винисиус “Реал”дан кетишни айтди
Испания чемпионатининг ўнинчи тури доирасида бўлиб ўтган навбатдаги “Эл-Класико” нафақат майдондаги, балки ички муҳитдаги зиддиятлар билан ҳам ёдда қолди. “Сантяго Бернабеу”даги баҳсда “Реал” футболчилари 2:1 ҳисобида ғалаба қозониб, “Барселона” устидан муҳим ғалабани қайд этди. Аммо бу муваффақият жамоа ичидаги кескин вазиятни юмшатмаган кўринади.
Учрашув сўнгги дақиқаларида “қаймоқранглилар”нинг бразилиялик юлдузи Винисиус Жуниор атрофида можаро келиб чиқди. У 72-дақиқада захирага олинган чоғида ўз ҳис-туйғуларини яшира олмади: бош мураббий Хаби Алонсога қўл бермасдан тўғридан-тўғри ичкарига йўналди. Кейинчалик эса ўйин охирида “Барселона” футболчиси Ламин Ямал билан тортишувга ҳам киришди.
Marca ва DAZN нашрлари ёзганидек, Винисиус захирага олинган лаҳзада “Мен жамоадан кетаман, кетганим яхши бўлади”, деган сўзларни айтган. Бу сўзлар “Реал” мухлислари орасида жиддий муҳокамаларга сабаб бўлди.
AS газетасининг маълум қилишича, Винисиус охирги пайтларда Хаби Алонсо билан муносабатларда совуқлик сезаётганини ҳис қилмоқда. Бразилиялик футболчи ҳимояда кўпроқ ишлаётгани ва мураббий кўрсатмаларига амал қилаётганини айтса-да, у ўз меҳнатининг етарлича қадрланмаётганидан норози. “Алонсо менга ишонмаяпти, мени асосий ўйинчи сифатида кўрмаяпти”, — деган экан Винисиус яқинларига.
Ҳозирда жамоа ичидаги вазият жиддий муҳокама қилинаётгани хабар қилинмоқда. Агар вазият ўзгармаса, 25 ёшли футболчи январдаёқ клубни тарк этиши мумкинлиги айтилмоқда. Бу “Реал” учун жиддий йўқотиш бўлиши аниқ, чунки Винисиус охирги йилларда клубнинг асосий фигураларидан бирига айланди.
Эслатиб ўтамиз, Винисиус Жуниор 2018 йилдан бери мадридликлар шарафини ҳимоя қилиб келмоқда. Унинг амалдаги шартномаси 2027 йилнинг 30 июнигача давом этади.
Мухлислар эса ҳозирда икки ўйда: бири Винисиусни қўллаб, унинг “қаймоқранглилар” сафида қолишини истаяпти, бошқалар эса жамоа ичидаги интизомни биринчи ўринга қўйиш тарафдори.
Ҳозирги вазият “Реал” учун янги синовга айланди — чемпионлик учун курашда нафақат майдонда, балки жамоа ичида ҳам мувозанатни сақлаш талаб этилади.