Наманган $700 минглик асалари пакетларини экспорт қилди

Наманган вилояти асалари пакетлари экспорти бўйича Ўзбекистонда етакчиликни сақлаб келмоқда. Жорий йил бошидан буён вилоятдан 30 мингта асалари пакети экспорт қилиниб, бу жами $700 мингни ташкил этди.

Маълумотларга кўра, мамлакат бўйича умумий ҳисобда шу давр мобайнида 132 мингта асалари пакети экспорт қилинган бўлиб, уларнинг умумий қиймати $3,3 миллионни ташкил этган. Шундан 30 фоиздан ортиғи Наманган ҳиссасига тўғри келмоқда.

Вилоятда 4,5 мингдан ортиқ асалари боқиш билан шуғулланувчи шахслар мавжуд бўлиб, улар жами 348 мингта асалари оиласини парваришламоқда. Жорий йил бошидан буён 4,5 минг тонна асал ишлаб чиқарилган.

Ишлаб чиқариш ҳажми йил сайин 10–12 фоизга ўсиб бормоқда. Бу эса соҳага бўлган эътибор ва ривожланиш суръатларининг барқарорлигини кўрсатмоқда.

Асалари пакетлари асалари уйларини жойлаштириш учун махсус жиҳозланган ёғоч қутилар ҳисобланади.