Автомобилни бошқа ҳайдовчи бошқарса, балл кимга ёзилади?

1 апрелдан бошлаб радарлар наfaqat жарима, балки жарима балларини ҳам ёзади, деб Uz24.uz хабар берди. Шу муносабат билан савол туғилади: агар автомашинани унинг эгаси эмас, бошқа шахс бошқарса, жарима баллари кимга ёзилади?

Ҳукумат қарорига кўра, жарима балларини транспорт воситасининг мулкдори ва ушбу воситадан фуқаролик-ҳуқуқий асосда (ишонгнома, суғурта полиси ёки йўл варақаси орқали) фойдаланувчи ҳайдовчи ўртасида тақсимлаш тартиби белгилаб қўйилди.

Бунинг учун мулкдор махсус ахборот тизимида шахсий кабинет очиши лозим. У воситани бошқа шахсга бошқариш учун бермоқчи бўлса, шахсий кабинетда унинг шахсини кўрсатади. Кўрсатилган шахс эса тизимга кириб, маълумотни тасдиқлаши керак бўлади.

Агар қабул қилувчи шахс маълумотни тасдиқламаса, жарима баллари транспорт воситаси эгаси ҳисобига ёзилади (агар унда ҳайдовчилик гувоҳномаси бўлса).

Шунингдек, агар эгасида ҳайдовчилик гувоҳномаси бўлмаса ва баллар йиғиндиси 12 баллдан ошса, транспорт воситаси вақтинча жарима майдончасига жойлаштирилади.