12 адам қаза тапқан жол апаты: аман қалған ер адам Астанаға жеткізілді
Ақтөбе облысындағы жантүршігерлік жол апатынан зардап шеккендердің бірі Астанаға жеткізілді, - деп хабарлайды Tengrinews.kz тілшісі.
28 қазанда ТЖМ "Қазавиақұтқару" ұшағы Ақтөбе-Астана бағыты бойынша санитарлық рейс жасаған. Самара-Шымкент тасжолында болған жол апатында жарақат алған 50 жастағы ер адам елордаға жеткізілген.
"Науқастың жағдайы ауыр болғандықтан, оны шұғыл түрде Астанаға тасымалдау қажет болды. Ұшақ медициналық құрал-жабдықтармен толық қамтамасыз етіліп, бортта дәрігерлер үздіксіз бақылау жүргізді. Ер адам елордада емін жалғастырады", - деп жазылған хабарламада.
Мән-жайы
Еске салайық, 23 қазанда Самара-Шымкент тасжолында, Белқопа ауылының маңында DAF жүк көлігі мен ГАЗель соқтығысты. Алдын ала мәлімет бойынша жүк көлігі қарсы қозғалыс жолағына шығып кеткен. Оқиға салдарынан 12 адам қаза тапты.
Сілтемесіз жаңалық оқисыз ба? Онда Telegram желісінде парақшамызға тіркеліңіз!