Ламин Ямал Пике ва Шакиранинг уйини сотиб олмоқчи

“Барселона”нинг ёш вингери Ламин Ямал янги мавсумни нафақат майдондаги ютуқлар, балки шахсий ҳаётидаги катта ўзгаришлар билан ҳам бошлади. 18 ёшли футболчи ёзда каталонияликлар билан узоқ муддатли шартнома имзолаб, жамоанинг энг кўп маош олувчи ўйинчилари қаторига кирди, деб хабар берди Sport.es.

Маълумотларга кўра, Ямал шундай ютуқдан сўнг ўзининг биринчи катта сармоясини амалга оширишга қарор қилган. У “Барселона”нинг собиқ ҳимоячиси Жерар Пике ва машҳур хонанда Шакира бир вақтлар яшаган ҳашаматли уйни харид қилмоқчи. Бу уй шаҳар четида жойлашган бўлиб, узоқ йиллар давомида Каталония шоу-бизнес ва спорт оламининг энг кўзга кўринган жуфтлиги истиқомат қилган маскан сифатида танилган.

El País нашрининг ёзишича, Ямал бу уйда якка ўзи эмас, балки севгилиси — аргентиналик хонанда Ники Николь билан яшашни режалаштирган. Улар муносабатларини очиқ тутмоқда ва бу хабар Испаниядаги мухлислар орасида катта қизиқиш уйғотган.

Ямалнинг бу қарорини кўпчилик “муваффақият рамзи” сифатида баҳоламоқда. У 18 ёш бўлишига қарамай, шундай даражадаги мулкни сотиб олиш имконига эга бўлди — бу унинг нафақат молиявий, балки маънавий жиҳатдан ҳам улғайганини кўрсатади.

Қизиғи шундаки, агар битим амалга ошса, Ямалнинг янги қўшнилари ҳам “Барселона” футболчилари бўлади — жамоадошлари Алехандро Бальде ва Рональд Араухо ҳам шу маҳалла атрофида истиқомат қилади.

Инсайдерлар ёзишича, футболчи бу уйни инвестиция сифатида ҳам кўрмоқда. Сабаби, каталониялик юлдуз келгуси йилларда бу ҳудудда ўз шахсий брендини йўлга қўйиш ниятида.

Ламин Ямал учун бу қарор унинг ҳаётидаги янги босқич бўлиши мумкин. У майдонда “Барселона”нинг асосий фигураларидан бирига айланиб бораётган бир пайтда, шахсий ҳаётида ҳам ўзининг янги “майдони”ни белгиламоқда.