Брамбила бошчилигида "Ювентус" ғалаба қозонди
2025 йил 30 октябр куни "Ювентус" жамоаси бош мураббий вазифасини вақтинча бажарувчи Массимо Брамбила қўл остида илк ғалабасини қўлга киритди. Турин жамоаси ўз майдонида "Удинезе"ни 3:1 ҳисобида мағлуб этди.
Бу ўйин А Сериянинг тўққизинчи туридан ўрин олган эди. Ўйин бошидан "Ювентус" ташаббусни ўз қўлига олди.
5-дақиқада ҳакам Влаховичга қилинган қўполлик учун пеналти белгилади. Сербиялик футболчи зарбани аниқ амалга ошириб, ҳисобни 1:0 кўринишига олиб келди.
Бироқ биринчи бўлим якунланишига яқин меҳмонлар ҳисобни тенглаштиришга эришди. "Удинезе"нинг қаттиқ ҳужуми натижасида тўп Заньолонинг олдига тушди ва у чап бурчакка кучли зарба берди — 1:1.
Шу ҳисоб билан жамоалар танаффусга чиқди. Иккинчи бўлимда "кекса синьора" ўйин суръатини ошириб, Окое дарвозасига жиддий босим ўтказа бошлади.
Йилдиз ва Опенда бир нечта яхши имкониятларга эга бўлишди, аммо меҳмонлар дарвозабони ўзини кўрсатди. 67-дақиқада Камбясонинг узатмасидан сўнг Гатти бош билан зарба бериб, "Ювентус"ни яна олдинга олиб чиқди — 2:1.
90-дақиқада ҳакам Гогличидзенинг Йилдизга нисбатан қўполлиги учун пеналти белгилади. Турин жамоаси ҳужумчиси зарбани аниқ амалга ошириб, ўйинга якуний нуқта қўйди — 3:1.