Ўзбекистонда гўшт нархи 23 фоизга қимматлади

Йил бошидан буён гўшт нархи 23 фоизга қимматлади, деб Uz24 сайти хабар берди.

Марказий банк бошқаруви раиси Тимур Ишметов 24 октябр куни бўлиб ўтган матбуот анжуманида иқтисодиётдаги ижтимоий аҳамиятга эга товарлар нархини барқарорлаштириш бўйича ҳукуматнинг чораларини маълум қилди.

Сентябр ойида умумий инфляция 8% даражасига секинлашган бўлса-да, ижтимоий аҳамиятли товарлар нархи анча юқори даражада қолмоқда. Йил давомида қуйидаги товарлар нархи ошган:

– Мол гўшти — 23,2% (тахминан 108,000 сўм/кг)

– Картошка — 18,5%

– Бензин — 11,8%

Ишметов таъкидлашича, бу маҳсулотлар нархини барқарорлаштириш учун тегишли вазирлик ва идоралар билан ҳамкорликда амалий чоралар кўрилмоқда.

Келгуси йилларда инфляцияни паст ва барқарор даражада ушлаб туриш учун таклиф билан боғлиқ асосий омилларни бартараф этиш, ички бозорда рақобатни кучайтириш, тариф ва нотариф чекловларни камайтириш лозим. Шунингдек, энергия ресурсларини узлуксиз етказиб бериш ва транспорт инфратузилмасини ривожлантиришга катта аҳамият қаратилмоқда.

Бу чоралар иқтисодий барқарорлик ва товарлар нархини барқарорлаштиришга хизмат қилади.