Йўл ҳаракати қоидаларини биринчи марта бузган ҳайдовчилар жаримадан озод бўлади
Олий Мажлис Сенати Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақидаги қонунни маъқуллади. Ушбу қонун ҳайдовчилар учун янги жазо чораси — огоҳлантиришни назарда тутади.
Бу ҳужжат огоҳлантиришни янги таъсир чораси сифатида белгилайди. Янги тартибга кўра, ҳайдовчи йўл ҳаракати қоидаларини биринчи марта унчалик жиддий бўлмаган тарзда бузганида, жарима солиш ўрнига огоҳлантириш олади.
Шу билан бирга, унга бундай бузилишнинг мумкин бўлган оқибатлари тушунтирилади. Жаҳон тажрибасида самарали қўлланилаётган ушбу амалиёт қайта-қайта қоидабузарликларнинг камайишига ва йўл ҳаракати иштирокчилари орасида интизомнинг ошишига ёрдам бериши кутилмоқда.
Шунингдек, ҳужжатда қуйидагилар аниқлаштирилган: - Фото ва видео қайд қурилмалари ёрдамида аниқланадиган қоидабузарликлар рўйхати; - Қоидабузарлик қайд этилган кундан бошлаб бир ой ичида жазони қўллаш муддати. Сўнгги ислоҳотлар фонида ижобий ўзгаришлар кузатилмоқда.
Жорий йилнинг саккиз ойи давомида йўл-транспорт ҳодисалари сони 2,4 фоизга, ҳалок бўлганлар сони эса 5,6 фоизга камайган. Шу тариқа, қабул қилинган норматив-ҳуқуқий ҳужжат ҳуқуқбузарликларнинг олдини олиш, ҳайдовчилар ҳуқуқий саводхонлигини ошириш ва жамиятнинг давлат тузилмаларига бўлган ишончини мустаҳкамлашга қаратилган.