Илон Маск 2030 йилгача телефонлар йўқолишини таҳмин қилди

Машхур тадбиркор ва технология оламининг энг таъсирли шахсларидан бири — Илон Маск келажакда смартфонлар умуман бозордан йўқолишини маълум қилди. Унинг сўзларига кўра, 2030 йилга келиб одамлар қўлидаги гаджетлар сунъий интеллектга асосланган янги авлод қурилмалари билан алмашади. Бу ҳақда Маск 31 октябрь куни журналист Жо Роган билан бўлган суҳбат чоғида гапирди.

Маск таъкидлашича, ҳозирги смартфонлар аслида сунъий интеллект тизимининг бир қисми, яъни видео ва маълумот таҳлили учун хизмат қилувчи тугун вазифасини бажаради. Улар фақат алоқа учун мўлжалланган радио модуллар билан жиҳозланган бўлиб, ҳақиқий “ақлли қурилма” эмас.

Технология соҳаси етакчисининг фикрича, келгусида фойдаланувчи қурилмаси тўғридан-тўғри AI серверлари билан боғланади ва маълумотларни реал вақтда қайта ишлайди. Бу дегани, инсон энди илова ёки операцион тизим орқали эмас, балки сунъий интеллект билан бевосита мулоқот қилади.

“Яқин 5–6 йил ичида биз классик ‘смартфон’ тушунчасидан воз кечамиз. Унинг ўрнини экран ва аудио орқали фаолият юритувчи, фойдаланувчининг фикрини олдиндан ҳис этадиган интеллектуал қурилмалар эгаллайди”, — деди Маск.

Унинг айтишича, сунъий интеллект шунчалик ривожланадики, у инсоннинг эҳтиёжини, кайфиятини ва ҳатто ниятларини олдиндан англай олади. Бундай мосламалар фойдаланувчи билан мулоқотни табиий суҳбат даражасига олиб чиқади.

Мутахассислар бу фикрни келажак технологияларининг янги босқичи деб баҳоламоқда. Маскнинг башорати амалга ошса, бу нафақат смартфон саноати, балки бутун рақамли экотизим учун туб бурилиш нуқтаси бўлади.

Илон Маск сўзларига кўра, AI асосидаги мосламалар инсониятнинг кундалик ҳаётидаги энг муҳим воситага айланади ва “экранли телефонлар” инсон тарихидаги навбатдаги босқич сифатида қолади.