Аҳолига яқин “заправка”лар хавфсиз ҳудудларга кўчирилади
Аҳоли яшайдиган ҳудудларга яқин жойлашган газ тўлдириш шохобчалари хавфсиз ҳудудларга кўчирилади. Бу ҳақдаги қарор 2026 йил март ойигача амалга ошириладиган чора-тадбирлар режасида белгиланди.
Маълумотларга кўра, Қорақалпоғистон Республикаси, вилоятлар ва Тошкент шаҳар ҳокимликлари Қурилиш ва уй-жой коммунал хўжалиги вазирлиги билан ҳамкорликда шохобчаларнинг ҳолатини ўрганиб, белгиланган талабларга жавоб бермайдиганларини аниқлайди.
2026 йил 1 апрелгача фуқаролар ҳаёти ва соғлиғига хавф туғдирадиган, атроф-муҳит ёки ёнғин хавфсизлиги талабларига зид бўлган “заправка”лар хавфсиз ҳудудларга кўчирилади.
Шохобчаларни кўчириш ёки бузиш билан боғлиқ харажатлар қонунчиликда белгиланган тартибда компенсация қилинади. Кўчириладиган шохобчалар учун инфратузилмага эга ер майдонлари ажратилади.
Агар шохобча эгалари ўз фаолиятини ўзгартиришни хоҳласа, уларга қонун доирасида бошқа турдаги фаолият билан шуғулланишга рухсат берилади.
Шунингдек, кўчирилган газ тўлдириш шохобчалари учун газ, электр энергияси ва бошқа тармоқларга уланишда истисно тариқасида техник шартлар берилади.
Ҳужжатда таъкидланишича, шохобчалар ҳимоя майдонлари ичида шаҳарсозлик нормаларига зид бўлган бошқа объектлар қурилиши қатъиян тақиқланади.
Мутахассислар фикрича, бу чоралар нафақат аҳоли хавфсизлигини таъминлайди, балки экологик ҳолатни ҳам яхшилашга хизмат қилади.