Арсенал сафарда Бёрнлини мағлуб этди
Англия Премер-лигаси 10-тур учрашувида "Арсенал" сафарда "Бёрнли"ни 2:0 ҳисобида мағлуб этди. Микел Артета жамоаси ўйинда тўлиқ назоратни қўлга киритган ҳолда рақибга жиддий қаршилик кўрсатиш имконини бермади.
Учрашувнинг дастлабки дақиқаларидаоқ меҳмонлар ташаббусни қўлга олиб, марказда ишончли комбинацияларини амалга оширди. 15-дақиқада "канонирлар" ҳисобни очишди.
Райснинг бурчакдан узатмасидан сўнг Габриэл тўпни марказга узатди ва Дьёкереш яқин масофадан дарвозани ишғол қилди — 1:0. "Бёрнли" ҳужумлар билан жавоб қайтаришга ҳаракат қилди, бироқ уларнинг имкониятлари меҳмонлар дарвозаси учун жиддий хавф туғдира олмади.
Танаффусга қадар лондонликлар босимни янада кучайтирди. 35-дақиқада чап қанотдан Троссарнинг узатмасидан сўнг Райс бош билан дарвоза тўрини ишғол қилиб, ҳисобни 2:0 кўринишига олиб чиқди.
Шундан сўнг "Арсенал" ўйинни тўлиқ назорат қилиб, рақибнинг камдан-кам ҳужумларини бартараф этди. Иккинчи бўлимда "Бёрнли" ҳужумларни кучайтирди, аммо меҳмонлар ҳимояси ўз вазифасини мукаммал бажарди.
Артета шогирдлари ҳисобни ушлаб қолиш учун тактик жиҳатдан оқилона ҳаракат қилиб, рақибга хавфли вазиятлар яратишга йўл қўймади. Ўйин тинч якунланди ва ҳисоб ўзгармади.
Мазкур ғалаба "Арсенал"га АПЛ турнир жадвалининг биринчи поғонасини мустаҳкамлашга имконини берди. "Бёрнли" эса ҳужумда самарали ҳаракат қила олмагани учун пастки ўринларда қолишда давом этмоқда.